Ipampannakel dagiti umili ti At-ato wenno tribal centers nga agserserbi kas multipurpose hall a pag-uumungan tapno pagsasaritaan dagiti nagduduma nga aktibidad ken pagsayaatan ti barangay.
Sigun kenni John Bugnosen, kagawad ti barangay Bila, Bauko Mountain Province idi immuna a panawen ket dagiti laeng lallakay ti mabalin a mang-usar ken agdesisyon kadagiti mapagsasaritaan a pakaseknan iti barangay.
Nupay kasta, ti at-ato iti agdama ket dakkelen iti nagbaliwanna no sadinno ket na-“modernize” ken napasayaaten ti imprastraktura daytoy ken, saan laengen a lallakay ti mabalin a mang-usar gaputa nakalukaten daytoy para kadagiti umili.
Sigun pay kenni Bugnosen, maararamaten ti at-ato para iti naununeg pay a kaipapapanna tapno maipasagepsep kadagiti baro a henerasion ti kinapateg ti at-ato ken nu ania ti akem daytoy iti biagda iti agdama.
Sigun pay ken ni Rodrigo Payacda, kapitan iti barangay ti Bila, ti at-ato ket agserserbi met laeng kas lugar para ti nagduduma nga okasyon ken sarita ti publiko tapnu maipakaammo ken maikkan ti gundaway dagiti umili a makibiyang kadagiti mapaspasamak ti aglawlaw.
Sigun pay ken ni Payacda, nakapreserba dagiti agkakaunaan a ramenta wenno Indigenous tools pakairamanan nu kasano nga usaren dagitoy, tapno iti kasta ket saan a maliwayan dagiti sumarsaruno pay a henerasyon.//Via Bernardo Rolino, Local News Correspondent
