BAGUIO CITY – Natiliwen ti babai a nangiwa wenno nangputed iti mabagbagi ti asawana idiay Purok 9, Balenben, Irisan, Baguio City itay laeng nabiit.
Napilaan metten daytoy ti kaso a panaglabsing iti Article 262 ti Revised Penal Code wenno ti Mutilation.
Maibasar iti imbestigasyon, agparparang a panagimon ti rason iti nasao nga insidente nu sadino, atapen ti suspect nga adda ti sabali a karelasyon ti biktima.
Sakbay ti insidente, naginom dagiti dua iti pagtaengan ti kabsat ti suspect ken idi nabarteken dagitoy, nagawidda iti bukodda a pagtaengan nu sadino, maatap a dituyen a killaat a pinuted ti babai ti mabagbagi ti asawana babaen iti kutsilyo.
Dagus a timmaray ti suspect kalpasan ti inaramidna a krimen bayat a rimwar met ti biktima tapno agpaarayat.
Kasaruno dayta, intaray met dagiti rimmesponde a kameng ti pulisya iti pagagasan ti biktima nu sadino, naipasidong daytoy iti surgery ken naisublin ti mabagbagina.
Iti agdama, naipasidongen iti kustodiya ti Police Station 9 ti suspect sakbay a maiturong daytoy iti Bureau of Jail Management and Penology (BJMP) para iti pannakaibalodna bayat a narekober metten ti naaramat a kutsilyo para iti umno a disposisyon daytoy.
Ti suspect ket agtawen iti 55 bayat a ti biktima ket agtawen met iti 58, agpada a residente ti nadakamat a lugar.//Bombo Jez Lapizar
