OLYMPUS DIGITAL CAMERA
BAGUIO CITY – Nakalukat iti publiko ti maangay a Philippine Athletics Championship sadiay Baguio Athletic Bowl mangrugi inton bigat agingga inton Biyernes, Disyembre 17.
Iti interview ti Bombo Radyo Baguio, kinuna ni City Sports Coordinator Gaudencio ‘Gudz” Gonzales a nasurok iti 200 nga atleta a nagtaud iti nagduduma a paset ti pagilian ti makipaset iti nasao nga event.
Karaman kadagiti events a pasetan dagitoy dagiti nagduduma nga ay-ayam iti tay-ak ti Athletics pakairamanan ti track & fileds, running, throwing ken dadduma pay.
Sigun kenkuana, nakasaganan dagiti atleta kalpasan ti dua a bulan a pannakaipasidongda iti training bubble a pakairamanan dagiti sumagmamano nga atleta ti siudad.
Ditoy met a mapili dagiti atleta a mangbukel iti national Team ti Pilipinas iti sidong ti Philippine Amateur Track and Field Association (PATAFA).
Iti met interview ti Bombo Radyo kenni City Administrator Bonifacio dela Peña, inyunay-unayna a nainget a maipatungpal dagiti protocols ti siudad kabayatan ti event malaksid pay iti bukod nga protocols ti PATAFA.
Imbinglayna a temporaryo a nasuspendir dagiti manarimaan a patrabaho iti Baguio athletic Bowl malaksid iti mailepleppas a panakapapintas ti bleachers area.
