BAGUIO CITY – Nakasaganan ti Baguio City Police Office para iti manamnama nga isasangbay dagiti turista iti holyweek.
Iti panakiuman ti Bombo Radyo kenni Police Captain Angeline Dongpaen, panakangiwat ti Baguio City Police Office, pakabuklan a 526 a personnel ti maideploy kabayatan ti uppat a nangingina nga aldaw pakairamanan ti Palm Sunday, Maundy Thursday, Good Friday, ken Black Saturday.
Sigun kenni PCapt. Dongpaen, manamnama ti kaadda dagiti personnel iti police tourist assistance desk kadagiti kangrunaan a pagturturungan dagiti indibidwal kas iti simbaan/kapilya, dagiti nalalatak a pagpasyaran, kasta met kadagiti control points.
Mainaig iti dayta, impanamnama ti opisyal ti naannayas a gunay ti trapiko bayat ti holiday gapu ta nakasaganan ti pwersa ti Baguio City Police Station-Traffic Enforcement Unit a mangimanihar iti volume wenno kaado dagiti lugan a sumang-at.
Inyunay-unay pay ni Dongpaen nga agingga a saan pay a nangipaiyulog ti Baguio City ti ordinansa a mangsuspindir iti number coding scheme kadagiti lugan ket agtultuloy ladta ti panakaipatungpal daytoy.
Malaksid iti dayta, maisingsingasing met kadagiti turista ti carpooling tapno saan unay nga adu dagiti lugan a sumang-at iti Summer Capital.
Kabayatanna, maipalpalagip iti publiko ti panagridam dagitoy kontra kadagiti mananggundaway a posible a mangaramid kadagiti krimen kas iti panagtakaw ken picpocketing.//Bombo Rob Dominguez
