BAGUIO CITY – Makipatang ti lokal a gobyerno ti Baguio kadagiti maseknan nga opisina, pakairamanan ti Department of Agriculture inton sumaruno a lawas tapnu pagsaritaanda ti maisaksakad a panakaisubli ti panagtaraken ti baboy ditoy siudad.
Iti interview ti Bombo Radyo Baguio, kinuna ni City Councilor Philian Louise Weygan-Allan, dadaulo ti Committee on Market, Trade and Commerce, and Agriculture iti lokal a konseho a maangay ti nasao a taripnong inton sumaruno a lawas.
Inlawlawagna a kasapulan wenno napateg ti nasao a singasing gaputa bassiten ti suplay ti baboy a maiturturong ditoy lokalidad ken dagiti nasao a baboy ket agtataud pay sadiay Mindanao.
Dinakamatna nga iti urban agriculture ket mabalin ti panagtaraken ti baboy la ketdi dagitoy ket maisayangkat kadagiti nasulinek a disso iti siudad tapnu awan ti agriri ken awan ti mapasamak a panakasabidong ti nakaparsua-an.
Innayonna a mismo a ti Department of Agriculture ken ti City Veterinary and Agriculture Office ti nangkuna a mabalin ti nasao a singasing.
Sigun pay kenni Councilor Weygan-Allan, isingsingasingda met iti lokal a konseho ti siudad ti panakaisakad ti panagtaraken ti rabbit kas alternatibo ti panagtaraken ti baboy ditoy lokalidad.
