![](https://img.bomboradyo.com/baguio/2020/08/licaycay.jpg)
BAGUIO CITY – Malamlamayan ita ti bangkay ti maysa a Cordilleran nga agserserbi nga assistant instructors ti Special Action Force (SAF) Commando Course (SAFCC) ti Philippine National Police a pimmusay kalpasan a nakuryente kabayatan ti panagsanay dagitoy sadiay Batangas idi Lunes, Agosto 10.
Nabigbig daytoy a ni Police Staff Sergeant Adonis Awing Licaycay, 27-anyos ken residente ti Bulanao, Tabuk City, Kalinga.
Iti interview ti Bombo Radyo Baguio kenni PCapt. Rod Kevin Talplacido, public information officer ti 2nd Special Action Battalion ti PNP-SAF, kinunana a nakuryente ni Licaycay kabayatan ti maysa a panagsanay dagitoy sadiay Calatagan, Batangas
Imbinglayna a kabayatan ti nasao a panagsanay ket agtultuloy ken napigsa ti tudo isut gapuna a nagpakada ni Licaycay nga agawid iti barracks-da tapno ipaunegna dagiti lalabaan daytoy.
Dinakamatna a maysa nga estudyante ni Licaycay ti nakakita a nakaidda ti nasao nga instructorda iti stage ti training area dagitoy ken impagarop ti estudyante a nakaturog laeng ni Licaycay.
Inasitgan ti nasao nga estudyante ni Licaycay ngem killaat a nakuryente idi ingemmana ti awanan puot a pulis.
Gapu iti daytoy, dagusda a nangipatungal iti cardiopulmonary resuscitation iti inanamada a maispal pay ni Licaycay ngem naideklara a pimmusay idi intarayda iti Western Batangas Medical Center.
Dinakamat ti opisyal a daytoyen ti maikadua nga insidente ti panakakuryente dagiti miyembro ti PNP-SAF ngem ni Licaycay ti kaunaan a commando a pimmusay gapu iti nasao a pasamak.
Impeksa met ti sibubukel a PNP-SAF ti panagladingitda ken ti panakipagriknada iti pamilya ti ibilbilangda a banuar iti pulisya.
Kagiddan iti daytoy ket impasigurado ni PCapt. Talplacido ti panakaipaay ti tulong pinansial iti pamilya ni Licaycay manipud iti PNP-SAF ken kadagiti nagduduma pay nga organisasyon ken ahensia ti gobyerno.
Dinakamatna nga addan ti impaay ti Batangas Foundation a P20,000 para iti pamilya nga imbati ti banuar bayat a nangipaay metten ti PNP-SAF Alumni Foundation iti P50,000.
Innayonna a pagsasaritaan pay dagiti opisial ti PNP-SAF ti kanayunan a tulong pinansial a maipaay iti imbati a pamilya ti Cordilleran police malaksid a maipaayan pay iti medalya gapu iti serbisyona iti pagilian.