BAGUIO CITY – Nasarakan ti bangkay ti maysa a napapatay a minero sadiay Lower Midas, Ucab, Itogon, Benguet idi agsapa kalman.
Nabigbig daytoy a ni Eddie Lumbag, baro, minero, residente ken tubo ti Besao, Mountain Province.
Nabigbig met dagiti suspek a da Jommel Yong-an Saliong, 31-anyos, baro, minero, residente ti Magsaysay Loakan, Baguio City ken Raymond Butigan Butoeg, 25-anyos, baro, minero, residente ti Purok 3, Km. 4, Asin Road, Baguio City.
Maibasar iti imbestigasyon ti Itogon Municipal Police Station, agin-inom iti arak ti biktima ken dagiti suspek sadiay Riverside, Virac, Itogon, Benguet idi rabii ti Sabado, Agosto 29.
Kalpasanna ket pinanggep dagitoy nga agturong iti siudad ti Baguio babaen iti puraw a revo vehicle nga addaan iti plaka nga XJX 414 tapno ituloyda nga aginom.
Nupay kasta, idi nakadanonda sadiay Lower Midas, Ucab ket nagsardengda tapno agisboda ket ditoy a maatap a timmaud ti saan a panagkinna-awatan dagitoy.
Maatap a tinengngel ni Jommel Saliong ti biktima ken pinakpak met ni Raymond Butoeg iti bato ti ulo ti biktima a nangitunda iti panakatay daytoy.
Dagus a nakemmeg dagiti suspek iti kampo dagitoy sadiay Riverside, Virac, Itogon, Benguet babaen iti hot pursuit operation nga insayangkat dagiti pulis ti Itogon nga indauluan ni Police Major Rommel Sawatang.
