![](https://img.bomboradyo.com/baguio/2021/03/miguel.png)
BAGUIO CITY – Naipaiman iti maseknan a pamilya para iti disente a panakalamayna ti bangkay ti maysa a Medical Officer ti rebelde a Communist Party of the Philippines-New People’s Army (CPP-NPA) nga imbati dagiti kakadwana iti maysa a kallapaaw sadiay Sitio Fukong, Barangay Gawa-an, Balbalan, Kalinga idi Lunes, March 15.
Nabigbig daytoy a ni Nora Miguel alyas Gemay, Medical Officer ti Komiteng Larangan Guerilla (KLG) Baggas ng Ilocos-Cordillera Regional Committee (ICRC) ken asawa ni Rudy Daguitan alyas Pinpin na political officer/political instructor ti kapada a grupo.
Maipalagip nga immuna a nasarakan ti bangkay ni Daguitan a naibati iti kallapaw dagiti rebelde a nasarakan dagiti soldado kalpasan ti panagrinnupakda sadiay Babacong, Gawa-an, Balbalan, Kalinga idi Lunes.
Maibasar iti report ti 5th Infantry Division, Philippine Army, nakaawatda iti impormasyon manipud kadagiti residente a karaman kadagiti pimmusay iti rinnupak ti asawa ni Daguitan ken iti panagsawar ti militar iti kabambantayan ket nasarakanda ti naabandona a bangkay ni Miguel.
Insalog ti militar ti bangkay ni Miguel iti tulong dagiti sibilyan ken impaimada daytoy iti pamilyana.
Maibasar iti DND-DILG Joint Order on Reward, ni Miguel ket addaan iti patong iti ulo a P400,000 ken sumangsango kadagiti kaso a double murder ken multiple frustrated murder.
Impeksa met ni Major General Laurence Mina, dadaulo ti 5th Infantry Division, Philippine Army ti panakipagrignana iti pamilya ti agasawa a lider ti CPP-NPA.
Kinunana a makapaliday ti napagteng ti agasawa gaputa imbati dagitoy dagiti kakadwana idi napasag dagitoy iti engkwentro kontra iti tropa ti gobyerno.