BAGUIO CITY – Pimmusay ti maysa a barangay tanod bayat a nadangran ti kadwana a barangay captain kalpasan a naaksidente ti nagluganan dagitoy a motorsiklo iti deppaar ti Malabbaga-Buli Barangay Road sadiay Buli, La Paz, Abra idi kanikadua.
Nabigbig ti pimmusay a ni Simeon Cayasan Aquino, 33-anyos, barangay tanod ti Barangay Poblacion, La Paz, Abra bayat a nabigbig ti nadangran a ni Fidel Bambico Belena, 35-anyos, kapitan ti Barangay Poblacion, La Paz, Abra.
Maibasar iti report, nakalugan dagiti dua iti maysa a motorsiklo nga awanan ti plaka ken nagserbi a driver ni Aquino bayat a back rider ni Belena.
Naamuan a paturong dagitoy iti direksion ti Barangay Buli Proper idi killaat a pimmartak ti pataray ni Aquino iti pakurba a paset ti kalsada.
Nagresulta daytoy iti aksidente a panakaidungpar ti motorsiklo a nagluganan dagiti dua iti kongkreto nga alad iti igid ti kalsada.
Gapu iti daytoy, nadunor ti ulo ken kanigid a saka ni Aquino bayat a nadunor ti rupa ni Belena.
Naitaray dagitoy iti Abra Provincial Hospital ngem naideklara a dead on arrival ni Aquino bayat nga adda metten iti natalged a kondisyon ni Belena.
Naamuan pay a saan a nakasuot iti helmet dagiti dua idi napasamak ti aksidente.
