BAGUIO CITY – Nakemmeg ti maysa a baro a drug personality iti insayangkat dagiti otoridad a joint anti-drug operation iti deppaar ti national road sadiay Purok 5, Bulanao, Tabuk City, Kalinga idi kalman.
Nabigbig daytoy a ni Mark Airone Arevalo Joya, 26-anyos, baro ken residente ti Timalan, Balsahan, Naic, Cavite.
Sigun iti Kalinga Police Provincial Office, naisayangkat ti interdiction operation kalpasan a nakaawat dagiti otoridad iti impormasyon iti panangibiahe ni Joya iti iligal a droga.
Nagresulta daytoy iti panakakemmeg ni Joya ken iti panakakumpiskar iti ikotna ti uppat a marijuana bricks ken tallo a tubular marijuna a naikabil iti puraw a sako ken nalaokan ti natnateng.
Naisayangkat ti operasyon kalpasan a pinara dagiti otoridad ti parapasahero a bus a nagtaud sadiay Tinglayan, Kalinga ken nagluganan ni Joya.
Iti agdama, sumangsangon ti nakemmeg a drug personality iti kaso a panaglabsing iti RA 9165 wenno ti Comprehensive Dangerous Drugs Act of 2002.
