BAGUIO CITY – Sumangsango iti kaso a panaglabsing iti RA 9165 ti maysa a baro ken tallo a menor de edad nga estudyante kalpasan a naireklamo dagitoy iti panag-pot session iti asideg ti maysa a pagadalan sadiay Zone 3, Bangued, Abra idi kalman.
Nabigbig ti baro a ni Mars Jewel Daipan, 20-anyos bayat a dagiti tallo a kakadwana ket bin-ig a menor de edad nga estudyante ti ALS.
Sigun iti Bangued PNP, nakaawatda iti report seknan iti panag-pot session dagiti uppat iti asideg ti maysa a pagadalan sadiay Barangay Zone 3.
Dagus met a nagresponde dagiti pulis a nagresulta iti panakakemmeg dagiti uppat.
Nakumpiskar manipud kenni Daipan ti maysa a pakete ti marijuana bayat a nakumpiskar met iti bag ti maysa kadagiti menor de edad a paraphernalia a maatap nga inaramat dagitoy iti pot session.
Iti agdama, nakabaluden ni Daipan bayat nga adda iti kustodiya ti Bangued MSWD Office dagiti tallo a menor de edad. (-with Bombo Brigitte Marcasi)
