Agtultuloy a parikut ti barangay Harrison Carantes Claudio, Baguio City ti kinaadu ti basura a mapapataud iti night market, business establishments , ken residential establishment.
Iti pannakiuman ti Bombo Radyo kenni Marcelo Acupan barangay kapitan ti nasao a lugar, kinunana a nu man pay maysa kadagiti bassit a barangay iti syudad ti Baguio ti masakupanna a barangay ngem dakkel ti pakaseknan dagitoy maipapan iti basura.
Kinuna a kaadduan a barangay iti siudad ket kangrunaan a parikutda ti kinaadu ti basura.
Impeksana nga arigna payen a maar-aramat kas basuraan ti barangay dagitoy.
Daytoy ket gapu ta ti night market a maisaysayangkat sadiay Harrison road ket masakupan iti barangay Malcolm Square ngem ti staging area wenno pangiturturunganda iti basura ket masakupan iti barangay Harrison Carrantes Claudio.
Malaksid iti dayta, kinunana pay a maysa a problema dagitoy nga isu iti mangituntunda ti adu a basura nga agkaiwara, gapu ta sadiay metlaeng ti nakaurnungan dagiti jeepney terminals iti syudad a nangrugi idi kalpasan ti pandemya.
Parikut metlaeng dagitoy ket dagiti kargador ken dagiti sumagmamano nga indibidual nga aga-ariwa ken agiinum iti asideg ti night market a masukapan ti barangay Harrison kabayatan ti panag-urayda nga agsara wenno agleppas ti night market.
Kinuna ti kapitan nga adu dagiti residente nga agrekreklamo mainaig iti dayta gapu ta pasaray madisturbu ti turug dagitoy.
Binallaagan ken kinatungtung daytoy ti kapitan dagiti kargador ngem kaskadi ladta nga awan ti denggen dagitoy.
Kabayatanna, impeksa ti kapitan nga isu nga awan iti maaw-awat dagitoy nga award ket gapu ta kastoy iti mapas-pasamak.
Gapu iti dayta agkidkidaw iti tulong ti kapitan kadagiti amin nga ag-dengdengngeg iti nasao a pakaseknan ken kadagiti adda iti terminal nga agtitinulong dagitoy para iti kinadalus ti aglawlaw dagitoy.//Bombo Noveh Organo
