BAGUIO CITY – Inlawlawag ti Baguio City Police Office (BCPO) ti napasamak a panangdangran ti maysa a pulis iti maysa a lalaki a nabartek sadiay Kayang Street, Baguio City idi kalman.
Iti interbyu ti Bombo Radyo-Baguio ken ni Police Col. Allen Rae Co, dadaulo ti BCPO, kinunana a napasamak ti insidente kabayatan ti panagpatrolia ti nasao a policewoman sadiay Kayang Street.
Kinunana a nakita ti pulis nga adda ti sumagmamano lallaki a nagdidinnangran isut gapuna nga inanawa dagitoy ti pulis.
Nupay kasta, nangisawang ti maysa a lalaki a nabartek iti dakes a pannarita kontra iti babai a pulis ken pinangtannanna pay daytoy.
Nagpatulong ti policewoman kadagiti padana a pulis ken idi simmangpet ti dua a lalaki a pulis ket saan latta a nagpaanawa ti suspek ken dinangranna pay ti policewoman.
Gapu iti daytoy, napilitan ti maysa a pulis a mangdangran iti nabartek a suspek tapno sumardeng daytoy.
Impetteng ni Co nga apaman a simmardeng ti suspek ket saanen nga inulit a dinangran daytoy ti pulis.
Iti baet daytoy, inbilin ni Co ti pannakaimbestigar ti nasao nga insidente tapno maduktalan no maibilang kas panaglabes ti panangdangran ti pulis iti nabartek a suspek.
Kinunana a nakaswan metten ti suspek gapu iti panangdangranna iti nasao a policewoman.
Innayon ni Co a mapatawan iti pannusa ti nangdangran a pulis no maduktalan a naglabsing daytoy iti pagalagadan.
