Dumanun iti uppat(4) ti nakumpirmar a kaso ti ti pertussis iti probinsya ti Benguet iti baet ti reporting period a January 1 agingga April 27.
Iti panakiuman ti Bombo Radyo kenni Dr. Cham Bacuso, Medical Specialist 1 ken Public Health Programs Head ti Provincial Health Office-Benguet, dua kadagiti nakumpirmar a kaso ti pertussis ket nagtaud sadiay La Trinidad bayat a saggaysa met manipod Sablan ken Tuba.
Sigun kenni Dr. Bacuso, dua pulo ket pito(27) met ti suspected cases nu sadino, naobserbaran kadagiti pasyente dagiti sintomas ti nasao a sakit ngem saan a nagtunos daytoy iti resulta ti laboratoryoda.
Kagiddan dayta, mapalpalagipan ti publiko a kumpletuwen dagitoy ti series ti bakuna nangruna dagiti ubbing a vulnerable iti pertussis.
Iti sabali a bangir, impakaammo ni Dr. Bacuso nga awan ti kumpirmado a kaso ti rabies kadagiti indibidwal iti probinsya ti Benguet.
Nupay kasta, dinakamatna a ngumatngato ti bilang dagiti mapan agpakpakonsulta gapu iti animal bite partikular kadagiti dingwen nga aso.
Gapu iti dayta, impaganetget ti doktor a maspaol ti saan a panangbaybay-an kadagiti panakakagat wenno panakakalmot kadagiti ayop ken ti dagus a panagturong kadagiti health center wenno animal bite treatment facilities para iti dagus a panakataming.//Bombo Rob Dominguez
