Manamnama a manayonan pay dagiti botante nga agparehistro para iti 2025 local and national election gapu ta agingga Setyembre 30 ti registration period iti siudad ti Baguio.
Iti panakiuman ti Bombo Radyo kenni Atty. John Paul Martin, Commission on Elections Officer ti Baguio, dumanon iti agarup tallo a ribo ti nagparehistro iti siudad ti Baguio manipud Pebrero 12 agingga Marso 31 bayat a 4,700 nga indibidual ti nagparehistro idi April 1 agingga iti agdama.
Sigun kenni Atty. Martin, manamnama ti isasangbay ni George Erwin Mojica Garcia, Chairperson ti Commission on Elections inton Hulyo kagiddan ti panakaipatungpal ti “special registration” kadagiti manamnama a kadete a sumrek iti Philippine Military Academy.
Kabayatanna, kinunana nga agsanagan dagiti indibidual nga agpangpanggep nga agserbi iti pagilian gapu ta ti filling of candidacy ket inton Oktubre 1 agingga Oktubre 8 nu sadino mapalubosan dagitoy a mangipila iti aldaw ti Sabado ken Domingo.
Ditoy met ti panawen a mabalin a maipatungpal ti substitution due to withdrawal.
Innayon pay ni Atty. Martin a ti election period ket inton Enero 12 agingga Hunyo 11, 2025.
Malaksid iti dayta, ti panagrugi ti panagkampanya para kadagiti national candidates ket inton Pebrero 11 agingga Mayo 10, 2025 bayat a ti maudi a panagkampanya dagiti local candidates ken inton Marso 28 agingga Mayo 10, 2025.//Bombo Mera Pacpacan
