BAGUIO CITY – Dumanonen iti pito ti bilang dagiti pimmusay nga indibidual gapu iti dengue iti siudad ti Baguio mangrugi iti bulan ti Pebrero agingga Hulyo.
Kagiddan daytoy ti panagngato ti kaso ti dengue a dumanon iti 462 percent wenno 3,011 a bilang idi Agosto a dos, iti agdama a tawen.
Iti interview ti Bombo Radyo kenni Dr. Celia Flor Brillantes, City Health Services Officer, 70% a barangay iti siudad ti Baguio ket naapektaran ti dengue.
Maibasar iti datus ti City Health Services Office, nairekord ti kaunaan a pimmusay idi bulan ti Pebrero bayat a dagiti daduma pay ket nairekord idi Hunyo ken Hulyo, panawen a ngimmato ti kaso ti dengue iti siudad.
Manipud iti nasao a bilang, uppat kadagiti pimmusay ket ubbing, maysa a 1 year-old, four-year-old, 6-year-old, ken nine-year-old bayat a dagiti daduma ket 38-year-old, 59-year-old, ken ti kataengan a 63-year-old.
Maipalagip nga idi Hunyo, imbilin ni Mayor Benjamin Magalong ti nainget a panakaipatungpal ti anti-dengue ordinance ti siudad tapno maliklikan ti panagwaras dagiti kaso ti dengue a kadawyan a mapaspasamak manipud Hunyo agingga Oktubre.
Karamanen ditoy ti panakaipaay ti kaskenan a pannusa para kadagiti residente a saan nga agtungpal kadagiti dengue control measures.
Malaksid pay iti nainet a case surveillance, nainget nga ipatpatungpal ti City Health Services Office ti 5S anti-dengue public awareness campaign ken clean-up drives babaen iti “Denguerra – War against Dengue” program.
