Impasigurado ni Rey Quinto, Terminal Manager iti Solid North nga amin dagiti bus dagitoy ket nasukimaten para iti sumangbay nga All Souls’ Day ken All Saints’ Day.
Iti panakiuman ti Bombo Radyo kenkuana, kinunana a binulan a maipatpatungpal ti pannakasukimat dagiti bus tapno masigurado ti kinatalged dagiti pasahero.
Iti gadama, addaan dagitoyen iti 122 nga operational units ken manamnama a manayunan pay dagitoy iti sangapulo agingga kinse a units kaspangarigan maaprubaran ti special permits dagitoy.
Kagiddan dayta, impasigurado metlaeng ni Quinto nga umdas dagiti bus a maaramat bayat a namnamaenda nga umado pay ti pasahero a bumaba ken sumang-at iti Baguio City.
Iti agdama, adun dagiti nagpa-advanced booking nangruna dagiti agturong idiay Manila,ngem sumagmamano paylaeng met dagiti nagpareserve nga agturong kadagiti probinsya.
Iti baet dayta, manamnama latta nga umadu pay ti bilang dagiti agpareserve wenno agpabook mangrugi inton bigat
Kabayatanna, itay laeng agsapa ket naobserbaran ti adu a bilang dagiti pumilpila kadagiti terminal nga agur-uray kadagiti bus a paglugananda.//Bombo Jez Lapizar
