LA TRINIDAD, BENGUET – Panggep ti Benguet State University idiay La Trinidad, Benguet a limitaran ti bilang dagiti awatenda nga estudyante para iti school year 2025-2026.
Sigun kenni Dr. Kenneth A. Laruan, Presidente ti Benguet State University, marigatanda nga agaramid iti schedule para kadagiti estudyante gapu iti kinakurang dagiti faculty members ken classrooms.
Kinuna pay ni Dr. Laruan a babaen metlaeng iti daytoy ket maliklikan ti pannakaipatungpal ti online classes.
Nupay kasta, impasigurado ni Dr. Laruan a mangnayon metlaeng dagitoy iti awatenda nga estudyante apaman a maaddaanda iti pondo para iti pannakaipatakder ti pasdek a maaramat a classroom.
Inayon na a saan da nga ag-rehire iti Contract of Service (COS) faculty members gaputa marigatan ti nasao a pagadalan a bayadan dagitoy.
Maibasar iti datus, agarup 15,500 ti madama nga agad-adal iti Benguet State University La Trinidad main campus nu sadino limmabes daytoy iti maximum capacity a 12,000.
Inlawlawag met ni Dr. Laruan a ti laeng bilang dagiti incoming 1st year students ti malimitaran ken saan a maapektaran dagiti madama a naka-enroll iti nasao nga unibersidad.
Innayon ti nasao nga opisyal a saan metlaeng a maapektaran dagiti agala iti Masteral ken Doctorate Degree nu di ket panggepda a paadoen pay dagiti enrollees.
Iti agdama ket ado ti naka-enroll nga estudyante iti kurso a Nursing, Education ken Agriculture.
