Maisingsingasing kadagiti turista nga agturong iti Baguio City nga ikonsiderada iti carpooling tapno saan unay nga umado dagiti lugan a sumangbay iti siudad ita a panawen iti Paskua.
Kasaruno dayta iti maobobserbaran nga adu unay a bilang dagiti lugan a sumangsang-at iti Baguio City nangruna tunggal ngudo iti lawas.
Iti panakiuman iti Bombo Radyo kenni Engineer Bonifacio Dela Peña, Administrator iti Baguio City, nasaysayaat nu agtutulag dagiti agkakadwa nga agturong iti siudad nga agkakaluganda lattan ken saandan nga agaramat iti bukodda a transportasyon.
Daytoy ket makatulong tapno saan unay a mapasaran iti nailet a gunay iti trapiko.
Maipalagip nga itay laeng nabiit ket naglukaten dagiti kangrunaan a maitamtampok iti 2024 An Enchanting Baguio Christmas kas iti Christmas Market, ti panakasilaw iti Christmas tree iti paset iti Uupper Session Road, ti Presidential Museum, ken daduma pay a pagpasyaran iti siudad.
Malaksid iti dayta, maysa pay a ranrantaen ken tagtagiragsaken dagiti turista ti Sunday Pedestrianization iti Session Road a pakaitamtampukan dagiti nagduduma nga aktibidad, banag a nakumpirmar nga agtultuloy a maisayangkat ita a bulan babaen iti bileg iti executive order nga impaiyulog iti lokal a gobyerno iti siudad iti Baguio.//Bombo Rob Dominguez
