BAGUIO CITY – Awan ti maaramidan ti lokal a gobyerno ti Baguio iti panakapukan dagiti 54 a pinuon ti kayo iti pribado a lote sadiay Outlook Drive ditoy siudad.
Inaklon daytoy ni Councilor Betty Lourdes Flores Tabanda, chairman ti Committee on Laws iti City Council iti panakiyuman ti Bombo Radyo Baguio.
Inlawlawagna a daytoy ket gaputa iti Environment Code ti Baguio ket adda iti DENR ti otoridad no ti pakaseknan ket site development kas iti panagaramid ti subdivision wenno condominium iti pribado a lote.
Innayonna a legal nga adda ti karbengan ti agtagikua iti pribado a lote a mangaramid iti kayat daytoy a development nupay nasken a maitunos ken agtungpal dagiti paglintegan ken ikalkalikagum ti gobyerno.
Sigun iti konsehal, ti laeng maaramidan ti lokal a konseho iti agdama a pakaseknan ti ti agaramid iti resolusyon a mangkiddaw iti panangbaliw ti property owner iti disenyo ti proyekto ken ti panangrepado ti DENR iti nasao a pakaseknan ken iti panakaipataw ti nadagdagsen a kondisyon iti nasao a proyekto.
Kinuna ni Coun. Tabanda a nasken nga agbirukda iti wagas tapnu bilang saanda a mapasardeng ti panakapukan dagiti ad-adu pay a kayo ket maksayan ti bilang dagiti mapukan.
Inaklonna a malimlimitaran ti aksion ti lokal a gobyerno gaputa adda dagiti nasyonal a linteg a mangsaksakop kadagiti kapada a pakaseknan nangruna no ti lote nga ayan dagiti mapukan a kayo ket pribado.
Dinakamatna ti kaso ti panagpukan ti dakkel a mall iti adu a kayo ti saleng iti aglawlaw daytoy, no sadino, uray adda dagiti nagprotesta ket naituloy latta nangruna no kompleto ti dokumento ti pribado a lote.
Nupay kasta, linawlawagan ni Councilor Tabanda a makikaykaysada iti araraw dagiti umili a saan a panakapukan dagiti kaykayo iti siudad a maysa kadagiti pakabigbigan ti Baguio kas City of Pines.
