Nagkedked nga agkomento ni Commission on Elections (Comelec) chairman George Garcia iti ‘pangta’ ti maysa nga opisial ti Duterte Youth partylist nga ibutaktakna ti mapapati a korapsion ti nasao nga ahensia kalpasan a nasuspindir ti pannakaiproklamar ti nasao a partylist.
Idi gamin Lunes, sinuspindir ti Commission on Elections ti pannakaiproklamar ti Duterte Youth ken Bagong Henerasyon a nangabak a partylist bayat a maur-uray dagiti “disqualification petitions.”
Pinangtaan ni Duterte Youth chairman Ronald Cardema ti Commission on Elections nga iruarna no kasano nga adu kadakuada iti Kongreso ken ti poll body ti umaw-awat iti dakkel a gatad babaen kadagiti desision, “accreditations,” “projects” ken pondo.
Impasigurado ni Garcia a risuten ti commission en banc dagiti amin a pending a kaso kontra iti Duterte Youth ken Bagong Henerasyon party-list group sakbay ti Hunio 30, 2025.