Nagballaag ti Commission on Elections kadagiti amin a kandidato, naabak man wenno nangabak seknan iti gatad ti ginastos dagitoy bayat ti panagkakampanya iti kaleppas nga eleksyon.
Sigun kenni Comelec Chair George Garcia, dagiti nagsobra iti ginastosna a kwarta ket possible a mangitunda daytoy iti pannakadiskwalipikar.
Iti sidong ti section 13 iti Statement of Contributions and Expenditures (SOCE), dagiti kandidato, malaksid kadagiti agtaray iti kina-presidente wenno vice president ket aggastos laeng iti P3 tunggal rehistrado a botante iti masakupanda a lugar nangruna no karaman dagitoy iti political party.
Para met kadagiti indipendent candidates, rumbeng laeng nga aggastos dagitoy iti P5 tunggal registered voters iti metlaeng masakupanda a lugar.
Innayon pay ni Garcia a possible metlaeng a mapilaan dagitoy iti kaso no agsobra ti ginastosda a gatad.
