Inyunay-unay ti Commission on Elections nga awan ti bilegda nga automatiko nga ikanselar ti certificate of candidacy ni dismissed Bamban, Tarlac Mayor Alice Guo, no agtaray manen daytoy kas opisial ti gobierno inton 2025 elections.
Nupay kasta, sigun kenni Comelec spokesperson John Rex Laudiangco, kitaenda latta dagiti desision ti Ombudsman iti panangipaayda iti perpetual disqualification, agsipudta addaan daytoy iti datos ken dagus nga executory.
Immunan a kinuna ni Guo a saan pay a nakadisisyon, no agtaray manen daytoy para iti 2025 elections.
Kabayatanna, binilin ni Laudiangco dagiti botante a sukimatenda a nasayaat dagiti kandidato nga agngayangay para iti 2025 election.
Maipalagip a sumangsango ni Guo iti kaso a graft, qualified human trafficking, money laundering ken tax evasion gapu iti maipagarup a pakairamananna iti Philippines Offshore Gaming Operator (POGO) hub iti lugar daytoy sadiay Bamban, Tarlac.
Iti agdama, nakaibalud ni Guo iti Pasig City Jail.
