BAGUIO CITY – Namnamaen ti Baguio Employees Association Incorporated nga agtultuloy ti programa dagitoy tapno ad-adda a matulongan dagiti empleyado ti lokal a gobyerno ti siudad nga agkasapulan ti kanayonan a tulong.
Kasaruno daytoy ti balligi a Concert for a Cause a naisayangkat iti City Hall Grounds idi kalman.
Iti interview ti Bombo Radyo kenni Daisy De Guzman, mangidadaulo ti Baguio Employees Association Incorporated, panggep ti konsyerto a tulungan dagiti empleyado a napili a benepesyaryo ti asosasyon nga agkasapulan ti kanayonan a tulong.
Dagiti beneficiaries ket pito nga empleyado manipud iti nagduduma a departamento ti Local Government Unit a napili babaen ti assessment nga insayangkat dagitoy.
Inlawlawag ni De Guzman nga amin a proceeds a maala ti asosasyon manipud kadagiti nailako a tickets ket mabingay para kadagiti benepesyaryo.
Mainaig iti dayta, ti programa ket friendship meet metlaeng dagiti nagduduma a government agency bands ti siudad nu sadino dagitoy ti nagperform para iti konsyerto.
Karaman ditoy ti Bureau of Fire Protection, Bureau of Jail Management and Penology, Department of Education, Baguio City Hall, Philippine Military Academy ken dadduma pay.//Bombo Jez Lapizar
