BAGUIO CITY – Panggep ti provincial government ti Benguet nga isayangkat ti mass testing kadagiti sektor iti probinsia a narisgo iti COVID-19.
Sigun kenni Governor Melchor Diclas, naidanun kenkuana ti singasing dagiti Municipal Health Officers a panakaipasidong dagiti high risk sectors iti COVID-19 testing tapnu maamoan no adda pay dagiti positibo wenno nakaptan ti coronavirus.
Kinunana a napintas ti singasing nangruna ta nababa ti testing capacity ti probinsya a rason iti nagsasaruno a panakaipasidong ti Benguet iti Modified ECQ agingga iti agdama.
Kinunana nga iti kabiitan a panawen ket marugianen ti mass testing kadagiti high risk ken dadakkel nga establishimento kas kadagiti merkado, panganan, bangko, groserya, dagiti uniformed personnels ken dadduma pay.
Inyunay-unayna met a kabaelan ti molecular laboratory ti Benguet General Hospital a mang-akomodar iti 500 nga specimen iti innaldaw iti kanito a maisayangkat ti nasao a mass testing.
Innayon ni Gov. Diclas a no adda man dagiti agpositibo ket nawaya metten dagiti isolation facilities ti Benguet a mabalin a pakaiturongan dagitoy.
Kabayatanna, maisayangkat ti maysa a mass testing sadiay La Trinidad inton June 9-10 ken puntirya ditoy ti 500 nga indibidual.
