BAGUIO CITY – Naksayan pay iti tallo a ribo ti daily-limit dagiti turista a mapasangbay iti Baguio City kabayatan ti panakaipasidong ti siudad iti Alert Level 3 status.
Sigun kenni Supervising City Tourism Operations Officer Engr. Aloysius Mapalo, wagas daytoy ti lokal a gobierno kontra iti posibildad a panagngato pay ti kaso ti COVID-19 ken ti variants ti virus ditoy lokalidad.
Maipalagip a manipud Enero 6 agingga 18 ket naipababa iti 4,000 ti daily limit dagiti turista manipod iti sigud a 5,000 gapu iti pangta ti Omicron variant.
Kabayatana, kasapulan a mangiparang dagiti turista a nagtaud kadagiti lugar a naipasidong iti Alert Level 3 iti negative RT-PRC test a naala iti uneg ti 72 nga oras a kanayonan a travel requirement iti panagturongda iti siudad malaksid iti vaccination cards a maikalikagum kadagiti border quarantine checkpoints.
Maibasar iti datus ti Baguio VISITA a registration platform ti siudad para kadagiti turista, dakkel ti bimmabaan ti bilang dagiti mapaspasangbay a turista iti naglabas a lawas no idilig iti sitwasyon dagiti naglabas a lawas partikular ti holidays.
Manipod Enero 10 agingga 16, nasurok iti 21K ti naaprubaran a turista nga agturong ditoy siudad manipod iti nasurok 37K a travel request ngem agarop 3,500 laeng ti aktwal a bilang dagiti simmangpet iti City of Pines.
Nailista pay ti 2,072 a bilang dagiti turista a simmangpet ditoy siudad idi Enero 8 ngem bimmaba daytoy iti 997 idi Enero 9; 697 idi Enero 10; 439 idi Enero 11; 297 bayat nga 358 ti nailista idi Enero 16.
Iti datus pay ti ahensia, dumanon iti 241,872 a turista ti naaprubaran a sumrek iti siudad manipod Enero 1 agingga 16 ngem 110,217 ti aktwal a bilang ti napasangbay a turista n0 sadinno 121,664 ti immunan a nagbook kadagiti hotels.
