Pinaglibakan ni Police Captain Ruff Manganip, Public Information Officer ti Kalinga Police Provincial Office, a saan a pudno ti damag nga agwarwaras iti social media nga adda dagiti indibidual nga agrikrikus iti siudad ti Baguio tapno mangdangran kadagiti taga-Kalinga gapu iti napasamak a tribal war iti nasao a probinsia.
Impaganetget ti nasao nga opisial a palso ti damag ken saan a rumbeng a mamati ti publiko iti nasao a damag nangruna dagiti studiante iti University of the Cordilleras ken University of Baguio.
Iti interview ti Bombo Radyo iti nasao nga opisial, patienna a “trolls” wenno “dummy account” ti mangiwarwaras ti nasao a damag tapno mapirdi ti peace and order ken bummaba ti turismo iti nasao a lugar.
Sigun kenni Police Captain Manganip, puminpintas gamin ti ekonomia idiay probinisa ti Kalinga, isut rason a kayatda a saan a napintas ti imahe sadiay.
Patienna a saan a pudno daytoy gaputa adda metlaeng ti anakna nga agad-adal iti maysa kadagiti pagadalan a nadakamat.
Impakaamona nga iti kanito a maamuanda nu siasino dagiti mangar-aramid ti palso a damag, dagosda a mangipila ti kaso kontra kadagitoy.
Kasaruno ti damag nga adda dagiti taga-Kalinga iti siudad ti Baguio nga agrikrikus nangruna iti aglawlaw ti nasao a dua a pagadalan.
Nakalanad iti palso a damag nga iti kanito nga ibagada a nagtaudda idiay Kalinga, dagosda a dangran wenno bagsulen dagitoy.
Nadakamat pay a naka-red alert ti Kalinga iti agdama gapu ti tribal war sadiay, ngem sigun kenni Police Captain Manganip, naka-red alert ti Kalinga gapu iti eleksion, saan a gapu iti tribal war.
Kabayatanna, nangipaay daytoy ti mensahe kadagiti agar-aramid ti palso a damag.
