BAGUIO CITY – Manarimaan ti imbestigasyon ti Bureau of Fire Protection – Cordillera iti danyos dagiti nauram a kagawaan ken rason ti panakauram iti paset ti maikatallo a kadsaaran ti Maharlika Livelihood Center, Baguio City idi parbangon ita nga aldaw, Hulyo 16.
Iti interview ti Bombo Radyo kenni Lloyd Ashley Furigay, Senior Fire Officer 1 iti Bureau of Fire Protection – Baguio, maysa a walk-in security guard ti nangipakaammo kadagiti maseknan iti nasao nga insidente.
Kangrunaan a nauram iti nasao a kadsaaran ket dagiti rented gowns ken daduma pay a badbado.
Kinuna ni Furigay a medyo narigatan dagitoy a nangsebseb iti uram gapu iti napuskol nga asok ngem na-contain dagiti maseknan tapno saan pay a nagramaram iti daduma a paset ti pasdek.
Innayona pay a dagus a nagramaram ti uram iti uneg gapo ta nalaka a mauram dagiti kagawaan iti uneg ti kadsaaran.
Awan ti nadangran nga indibidual ken nauram a lugan.
Naideklara a fire out iti 4:20 ti agsapa metlaeng.
Iti agdama, saan pay nga accessible ti nauram a paset ti pasdek tapno maliklikan ti panagserrek ken panagruar dagiti tattao ken maipreserba dagiti ebidensiya a mabalin pay a maala dagitoy.
Kabayatanna, daytoyen ti maikapat nga insidente ti uram iti siudad ti Baguio para iti bulan ti Hulyo.
