BAGUIO CITY – Inwaragawag ni Nino Tibangay, Chief Education Supervisor iti DepEd Baguio nga inartapanda ti 50% a namnamaenda a magun-ud a balitok a medalya iti kaleppas a Cordillera Administrative Region Athletic Association 2025.
Iti pannakiuman iti Bombo Radyo kenkuana, kinunana a nasigurado nga agkampion ti siudad iti Baguio.
Maibasar iti obserbasion ni Tibangay, simmayaat ti performance dagiti dadduma a division offices iti Elementary Division.
Gapu iti dayta, bimmaba ti ranggo ti siudad partikular iti Elementary Division.
Sigun iti nasao nga opisial, kurang ti atleta iti suidad no maipapan iti Elementary Division.
Malaksid iti dayta, mangrugrugi paylaeng dagiti atleta kadagiti ay-ayam dagitoy isu’t gapuna a bimmaba ti “standing” dagitoy.
Iyunay-unay met ni Tibangay nga amin nga school Division ket kabaelanda nga imintiner dagiti performanceda iti uray anya a lokasion a pakaisayangkatan ti CARAA.
Kabayatanna, posible nga agtultultoy ti panagsanay dagiti ubbing iti baet a nagleppas ti CARAA 2025 kas panagsagana dagiti sumagmamano a makisalip iti palarong Pambansa.//mp4
