Addan iti natalged a kasasaad ti driver ti FX a lugan a nadangran gapu iti pannakatnagna iti garden sadiay Bangao, Buguias, Benguet.
Iti pannakiuman ti Bombo Radyo kenni Police Senior Master Sergeant (PSMS) Emson Salting, kinunana a napasamak ti aksidente itay agarup 1:40 iti malem ita nga aldaw.
Sigun kenkuana, naglaon ti nateng ti nasao a lugan ken paturong kuma iti siudad ti Baguio.
Nupay kasta, idi pasang-at daytoy iti kalsada ket mapapati a nagsubli manen iti baba gapu iti kinaadu ti karga daytoy a nateng a nangitunda iti pannakatnagna iti 20 metro ti kaunegna a garden.
Dagus met a nagresponde dagiti otoridad rason a naiturong ti nasao a driver iti pagagasan, ngem maibasar iti resulta ti x-ray daytoy ket minor injuries laeng ti nasagrapna.
Iti agdama, nadischarge ti nasao a driver iti pagagasan ken naiyawid daytoyen iti pagtaenganda.
