Napilaanen iti kaso a “Reckless imprudence resulting in homicide and physical injuries” ken ti panaglabsing iti RA 10586 wenno Anti-Drunk and Drugged Driving Act of 2013 ti driver ti pick up a nangatal iti motorsiklo a nagluganan ti dua a biktima sadiay La Trinidad.
Napilaan daytoy ti kaso a RA 10586, kalpasan a nagpostibo iti alcohol test a naipatungpal.
Iti report ti La Trinidad Traffic Management Section, napasamak ti panagbinnangga ti agarup 10:30 PM idi Setiembre 28, 2025.
Dagiti biktima ket pakairaman ti driver ti motor nga agtawen iti 21, maysa a construction worker ken residente sadiay Barangay Puguis no sadino ket naidekla a dead on arrival iti Benguet General Hospital.
Kabayatanna, adda iti critical a kasasaad ti agtawen ti 24 nga angkas daytoy kalpasan a naipurwak iti canal.
Nabigbig met ti driver ti pick-up nga agtawen ti 34, maysa nga impleyado iti gobierno ken residente metlaeng iti Munsipio ti La Trinidad, Benguet.
Iti immuna nga imbestigasion ti “traffic management section”, nagapu sadiay Barangay Pico ti pick up ken paturung ti Barangay Wangal bayat a ti motorsiklo ket nagapu sadiay Bokod ken paawid dagitoy sadiay Longlong.
Maibasar iti embistigasion, immagaw ti linya ti driver ti pick up a nangitunda iti panagbinnagada iti motorsiklo.//Bombo Noveh Organo
