BAGUIO CITY – Pimmusay ti maysa a drug pusher a subject ti naisayangkat a buy-bust operation kalpasan a bimmales ti pinaltoganna nga operatiba a nagpammarang kas buyer sadiay Shilan, La Trinidad, Benguet idi rabii.
Nabigbig daytoy a ni Hilario Viduya Pineda.
Sigun kenni PMaj. Roldan Cabatan, hepe ti La Trinidad PNP, gimmatang ti operatiba iti maysa a pakete ti mapapati a shabu manipud kenni Pineda ken inyawatna ti bayad.
Nupay kasta, nadiskobre ni Pineda a sumagmamano kadagiti kwarta a naibayad kenkuana ket peke.
Impukkaw ti suspek a peke ti kwarta sakbay a nangiruar ti paltog ken pinalpaltoganna ti nakatransaksionna nga operatiba.
Bimmales met ti naka-bulletproof vest nga operatiba a nagresulta iti dagus nga ipupusay ni Pineda.
Narekober manipud iti crime scene ti maysa a caliber 45 pistol, uppat a basyo ti bala, lima a bala, maysa nga sling bag a naglaon ti cellphone, innem a pakete ti mapapati a shabu, buy-bust money, ti motorsiklo ken sumagmamano a gameng ni Pineda.
Sigun iti pulisya, ni Pineda ket nakalista kas Street Level Target ti Directorate for Intelligence ti PNP ken nakalista met iti PDEA.
Naamuan nga addaan ni Pineda iti operasyon ti iligal a droga sadiay Abra, ditoy Baguio City, sadiay La Trinidad, Benguet ken dadduma a lugar sadiay Region 1.
Maibasar iti rekord, idi sakbay pay nga ag-18-anyos ni Pineda ket sumagmamano a daras a nakemmeg daytoy gapu iti panakairamanna iti nagduduma nga iligal nga aktibidad kas iti panagtakaw.
Naipaayan daytoy iti pagtaengan iti Women and Children Protection Desk ti Baguio City Police Office and ken naipaayan ti edukasyon babaen iti Alternative Learning System iti inanama dagiti pulis a mabaliwan ti biag ni Pineda.
Nupay kasta, pimmanaw ni Pineda iti poder dagiti pulis ken nagsubli daytoy kadagiti iligal nga aktibidad, pakairamanan ti iligal a droga. (-with Bombo Nikki Agsiweng | Cordillera PNP)
