Nasentensyaan ti innem agingga walo a tawen a pannakaikulong ti dua a sigud a barangay officials ditoy Baguio City gapu iti panaglabsing dagitoy iti Republic Act 3019 wenno ti Anti-Graft and Corrupt Practices Act, iti panaggatangda ti kagawaan nga aggatad P367,000.
Daytoy ket kalpasan a makumbiktar ti Baguio City Regional Trial Court ken masentensyaan ti Sandiganbayan ti sigud a kapitan ken treasurer ti Barangay Camp 7. Nabigbig dagitoy kas ni sigud a barangay captain Constancio Danao ken ni sigud a treasurer Romel Beltran.
Sigun iti Sandiganbayan, da Beltran ken Danao ket napaayan ti kontrata nu pay awan ti pre-bid conference. Ti nasao a pakaammo ken imbitasyon ket impablaak ni Beltran, uray a ti mapalabusan laeng a mangipablaak ti kastoy ket ti Bids and Awards Committee Secretariat.
Innayon pay ti Sandiganbayan nga awan ammo wenno saan a napakdaaran dagiti kameng ti Bids and Awards Committee mainaig iti nasau a proyekto.
Sigun pay iti Sandiganbayan, nagsarili da Danao ken Beltran a nangproseso kadagiti procurement ken disbursement, nu sadinno, saanda met nga otorisado.
Innayon pay ti Sandiganbayan a saan a naawat ti Barangay Camp 7 dagiti nasao nga item gapu ta napeke laeng ti pirma ni Angelina Ramos iti Inspection and Acceptance Report and List of Recipients, rason nu apay a nangipila metlaeng ti kaso a kriminal ken administratibo ni Ramos.
