BAGUIO CITY – Naipalubos ti panaglukat iti limitado nga aldaw dagiti electronic supply and accessory stores ken dagiti information and communications technology (ICT) gadget stores ditoy siudad ti Baguio.
Nailanad daytoy iti Executive Order No. 75, series of 2020 nga impaulog ni Mayor Benjamin Magalong.
Sagudayen ti pammilin a mapalubosan ti panaglukat dagiti nasao a pagtagilakuan tunggal Huwebes ken Biyernes iti alas-nuebe ti agsapa agingga iti alas-singko ti malem.
Inlawlawag ti mayor iti pammilinna a dakkel ti akem ti dynamic ICT systems iti panagbalin nga epektibo ti agdama a response mechanisms ti siudad kontra iti COVID-19.
Dinakamatna a naipalubos ti panagtuloy ti operasyon dagiti business process outsourcing sector ken ti export oriented manufacturing industries ngem nakadepende met ti operasyon dagitoy iti kaadda ti fully-functional ken saan a masingsinga nga ICT systems and programs.
Innayonna a tapnu saan a masinga ti operasyon ti dua nga industriya ket kasapulan ti panakaipalubos ti temporaryo a panaglukat dagiti electronic supply and accessory stores ken dagiti information ICT gadget stores ditoy siudad.
Immunan nga impalubosna ti limitado a panaglukat dagiti hardware stores, office supply stores, electrical supply stores ken auto supply stores iti kapada nga oras ken al-aldaw kabayatan ti Community Quarantine ditoy siudad.
