Manarimaan ti evaluation ti Office of the Provincial Prosecutors kadagiti ebidensya iti napasamak a pammaltog iti 38-anyos a babai idiay Bangued, West Central School idiay Barangay Zone 3, Bangued, Abra idi Mayo 27, 2024.
Iti panakiuman ti Bombo Radyo kenni Police Captain Cerel Gaspili, Deputy Chief of Police iti Bangued Municipal Police Station, kalpasan ti napasamak nga insidente ket dagus metlaeng a nakemmeg dagiti dua a suspek ken narekober ti caliber 45 nga inaramat dagitoy.
Nabigbig dagiti suspek a da Joemar Britanico Bayle, 40-anyos; ken Dennis Viado Britanico, 21-anyos, agpada a residente ti Langiden, Abra.
Maibasar iti imbestigasyon, nakatugaw ti biktima iti motorsiklona iti sango ti nasao a pagadalan idi simmangpet dagiti suspek a nakalugan iti motorsiklo ken pinaltoganda ti ulo ti biktima iti namindua a daras.
Dagus met a naitaray ti biktima iti ospital ngem naideklara a dead on arrival daytoy.
Kabayatanna, agkidkiddaw ni Police Captain Gaspili iti koordinasyon ken panakaawat dagiti umili iti nainget nga ipatpatungpalda a checkpoint tapno maliklikan dagiti aniaman a kita ti pammaltog iti nasao a probinsiya.//Bombo Mera Pacpacan
