BAGUIO CITY – Sumangsangon iti kaso a panaglabsing iti RA 9165 wenno Comprehensive Dangerous Drugs Act of 2002 ti maysa kadagiti Regional Top 10 Drug Personalities ti Cordillera kalpasan a natiliw iti buy-bust operation sadiay Chugum Street, Azkco Barangay, Baguio City idi kanikadua.
Nabigbig daytoy a ni Michael Fulgencio Cerezo, 43-anyos, fruit vendor, residente ti Kayang Hilltop, Baguio City ken tubo ti Dagupan City, Pangasinan.
Nakumpiskar manipud kenkuana ti maysa a pakete ti maatap a shabu nga agdagsen ti agarup nasurok maysa a gramo nga addaan Standard Drug Price a P6,800.00.
Narekober iti ikotna ti naaramat a buy-bust money.
Naamuan a nakalista daytoy kas maysa a High Value Individual iti iligal a droga.
Maibasar iti rekord dagiti otoridad, siguden a natiliw ni Cerezo iti panaglabing iti RA 9165 ken naipasidong iti probation.
Nupay kasta, intuloyna latta ti aktibidadna iti iligal a droga.
