BAGUIO CITY – Manarimaan ita ti hot pursuit operation dagiti otoridad kontra iti suspek a nangpaltog iti dua a biktima sadiay Brgy. Poblacion, Lagayan, Abra idi kalman ti rabii.
Immunan a nabigbig daytoy a ni Jomer Asistio Biyang, addaan iti legal nga edad, baro ken residente iti nasao a lugar.
Nabigbig ti pimmusay a biktima a ni Abelino Terredano Torrecampo, 31-anyos, maysa a plumber bayat a nabigbig met ti nadangran a biktima a ni Eric Parinas, addaan ti legal nga edad, baro, agpada a residente ti Brgy. Poblacion, Lagayan, Abra.
Maibasar iti inisyal nga imbestigasyon, nag-iinom ti biktima kadwada ti agnagan iti Elaine Biyang ken Joanna Marie Kocurek iti compound ni Mr. Serbando Tesoro idi killaat a sinumrek ti suspek a nakaiggem iti botelya ti arak.
Kabayatan ti panagsarita da Abelino Torrecampo ken ti suspek a ni Jomer Biyang ket inasut ti suspek ti paltogna ken ditoy a pinaltuganna dagiti biktima sakbay a timmaray.
Naitaray met dagiti biktima iti Abra Provincial Hospital babaen iti personnel ti Lagayan Municipal Police Station.
Nupay kasta, naideklara a dead on arrival ni Torrecampo gapu iti nasagrapna a dua a tama ti paltog bayat a maag-agasan ni Parinas gapu iti nasagrapna a maysa a tama ti paltog.
Improseso metten ti Abra Abra Forensic Unit ti nakapasamakan ti insidente.//Cara
