BAGUIO CITY – Pagyamyamanan ti lokal a gobyerno ti Baguio ti agtultuloy a tulong ken donasyon a maaw-awat ti siudad para iti kampanya kontra iti COVID-19 kagiddan ti manarimaan a panakaipasidong ti entero a Luzon iti Enhanced Community Quarantine.
Sigun kenni Mayor Benjamin Magalong, inpabulod ti agtagikua iti Lindi Hotel iti deppaar Legarda Road ti pasdek daytoy a maaramat kas containment center para kadagiti persons under investigation (PUIs) ti COVID-19 ditoy siudad nga addaan ti mild symptoms.
Kinunana nga addaan ti hotel iti 34 a silid ken kompleto a lodging facilities a dakkel a tulong tapnu manayonan dagiti quarantine rooms manipud kadagiti pagagasan ditoy siudad.
Ininspeksion metten da City Administrator Bonifacio Dela Peña ken City Health Officer Rowena Galpo ti pasilidad ken kinunada a muntaran ti lokal a gobyerno kadagiti required medical equipment, houseekeeping system ken dadduma a pagkasapulan tapnu agbalin nga operational mangrugi ita nga aldaw.
Nupay kasta, agkidkiddaw latta ni Mayor Magalong para iti kanayunan pay a quarantine rooms, pakairamanan ti panagkiddawna iti maysa nga ospital ditoy siudad ti panagbalin daytoy a treatment area a pakaiturongan dagiti mild, moderate ken severe positive cases iti COVID-19.
Impeksana metlaeng ti panagyamanna iti maysa nga indibidual a nangidonar iti uppat a package ti testing kits a naglaon ti 1,000 a pidaso para iti COVID-19.
