BAGUIO CITY – Pimmusay ti maysa nga Igorot a pulis bayat a napapatay ti maysa a drug suspect kalpasan a nagresulta iti engkuwentro ti insayangkatda a buy-bust operation sadiay Pililla, Rizal idi kalman.
Nabigbig ti kailyan a ni Police Staff Sgt. Michael Cayambas Cabillo, 31-anyos, residente ti Comillas, Cervantes, Ilocos Sur ken tubo ti Tadian, Mt. Province.
Naisayangkat ti operasyon sadiay Barangay Bagong Bayan iti agarup alas-onse ti agsapa kalpasan a nakaawat dagiti pulis iti impormasyon seknan iti nasaknap a panagilako ti suspek iti iligal a droga.
Sigun kadagiti otoridad, kabayatan ti transaksion ket nadlaw ti suspek nga undercover agent ti katransaksionna.
Gapu iti daytoy, dagus a nagasot ti paltog ken pinaputukanna ni Cabillo.
Kinuna dagiti pulis a sakbay a napugsat ti anges ni Cabillo ket nabaelan daytoy a napaltogan ti targetda a drug pusher a dagus met a pimmusay.
Naamuan a natamaan ti ulo ti banuar a pulis.
