BAGUIO CITY – Immado manen dagiti illegal peddlers wenno dagiti ambulant vendors iti merkado publiko ti siudad ti Baguio ken kadagiti pagnaan iti central business district (CBD).
Inwaragawag daytoy ni Public Order and Safety Division (POSD) Deputy Chief Daryl Kim Longid iti panakiyuman ti Bombo Radyo Baguio.
Sigun kenkuana, manipud naipasidong ti siudad iti General Community Quarantine agingga Modified General Community Quarantine ket nadlawda ti panagsubli manen dagiti illegal peddlers kadagiti disso a saan a rumbeng a paglakuan.
Dinakamatna a kaaduan kadagitoy ket dagiti siguden a problemada iti merkado publiko ken iti CBD sakbay pay ti agdama a pandemya.
Sigun kenkuana, agtultuloy met ti panangaksionda iti presensia dagiti illegal peddlers babaen iti panangbalballaagda kadagitoy ken iti panangkumpiskarda kadagiti tagilako no natangken ti ulo dagiti nasao nga ambulant vendors.
Nalidayan met daytoy iti panakadadael ti nagan ti POSD gapu iti sumagmamano a malisyoso a post iti social media iti baet nga ar-aramidenda laeng ti mandatoda.
Imbingay metlaeng ni Longid a no mamingsan ket maaddaan iti drama gaputa igagara dagiti illegal peddlers ti mangiwara iti lakoda wenno saan ket agpammarang a matalimudaw tapnu laeng maasi dagiti tattao kadagitoy.
Kinunana nga adda metten dagiti illegal peddlers nga inturturongda iti istasyon ti pulisya ngem mapalpalubusan kalpasan nga agpaka-asi kadagiti otoridad.
Dinayawna met ti panagsardeng dagiti sumagmamano nga illegal peddlers kalpasan a mabagbagaan dagitoy.
Nupay kasta, inaklonna a saan a maisardeng ti illegal peddling gaputa agsublisubli dagiti ambulant vendors gaputa daytoy ti pagbiaganda.
Maipalagip a P1,000 ti multa dagiti makemmeg nga aglablabsing iti illegal peddling ditoy Baguio.
