Agtultuloy ti imbestigasion dagiti otoridad seknan iti maatap a ‘robbery with violence and intimidation’ kontra kadagiti indibidual iti maysa a sand and gravel supplier idiay Dungon, Camp 1, Tuba, Benguet a napasamak itay laeng nabiit.
Iti inisial nga imbestigasion ti Tuba Municipal Police Station, maatap a pito a lallaki a saan pay a nabigbig ti suspek iti panagtakaw.
Dagitoy ket agpada a nakakawes iti nangisit a facemask.
Immuneg dagiti suspek iti pagnanaedan ti maysa kadagiti biktima a pinilitda tapno kadwaanna dagitoy nga apan iti opisina ti sand and gravel supplier company.
Apaman a nakadanon dagitoy iti lugar, dinamag dagiti suspek nu sadinno ti ayan dagiti kuarto dagiti empleyado.
Idi naamuanda, dagos a tinutukan dagiti suspek dagiti biktima nga adda iti uneg ti kwarto, ken intalida ti uma ken saka dagiti biktima babaen ti barot.
Kalpasan ti inaramidda, inayaban dagiti suspek ti maysa kadagiti biktima tapno apan iti opisina mismo, ken hinalughugda dagiti cabinet.
Ditoyda metten nga inala ti agarup P30,000 a kuarta.
Malaksid iti dayta, inalada pay ti kuarta a naikabil iti envelop a kukua ti aggragater, ken dagiti personal a kuarta dagiti uppat a biktima a dumanon iti P79,000, ken ti alahas nga agbalor ti agarup P26,000.
Apaman a naala amin dagiti suspek dagiti kayatda nga alaen, dagos a naglibas dagitoy iti saan nga ammo a direksion usar ti maysa a lugar.
Nakikoordinar metten ti nasao nga opisina iti Sison Municipal Police Statio ken Pangasinan Provincial Police Station tapno maimbestigaran ti nasao a panagtakaw ken ti posible a pakainaiganna iti sigud a panagtakaw a napasamak idi napalabas a tawen.
Iti sabali a bangir, naala metten ti sworn affidavits dagiti biktima wenno complainants para iti panagsagana ti kaso a maipila kontra kadagiti suspek.
Manarimaan metten ti koordinasion dagitoy kadagiti dadduma pay nga establisimiento nga addaan ti CCTV para iti pannakabigbig dagiti nagluganan dagiti suspek. | via Bombo Noveh Organo
