Impetteng ti Department of Justice (DOJ) a maituloy latta ti imbestigasyon iti naanomalyaan a flood control projects iti baet a saan a makipaset dagiti agasawa a contractor a da Pacifico “Curlee” ken Sarah Discaya.
Sigun kenni Prosecutor General Richard Anthony Fadullon, saan dagitoy a nakadependa iti aniaman nga ibaga wenno idiaya dagiti agasawa a Discaya.
Daytoy ket kalpasan nga imbabawi dagiti Discaya ti panaki-cooperate-da iti imbestigasyon ti Independent Commission for Infrastructure (ICI) seknan iti mapapati a naanomalyaan a flood control projects.
Kinuna ni Independent Commission for Infrastructure Executive Director Brian Hosaka, nga imbabawi dagiti agasawa a Discaya ti kooperasyon dagitoy kalpasan a nakitada ti media interview ni Commissioner Rogelio Singson, no sadino kinunana nga awan ti siasinoman a nakwalipikar nga agbalin nga state witness.
