BAGUIO CITY – Agtultuloy ti imbestigasyon dagiti otoridad para iti pakabigbigan ti suspek iti insidente ti panagtakaw idiay San Vicente Central, Baguio City idi laeng kalman, Marso 24.
Ti biktima ket maysa a pulis, 47-anyos a residente ti nasao a lugar.
Maibasar iti imbestigasyon, rimuar ti biktima iti alas dos ti agsapa ngem nagawid metlaeng daytoy a dagus iti alas singko ti agsapa.
Idi sumrek daytoy iti pagtaenganna, nasarakanna dagiti nagkaiwara a kagawaanna iti datar daytoy.
Nadlawna pay a nakalukat ti cabinet a nangikabilanna ti slingbag-na kasta met a mapukpukaw ti maysa pay a bag a naglaon ti paltog, sangapulo a P100 bill ken daduma pay nga alikamenna iti trabaho-na.
Maibasar pay iti kanayonan nga imbestigasyon, napagamwan a ti unidentified suspek ket nangikabil ti natangken a banag iti nagbaetan ti ridaw ken door jamb rason a nakastrek daytoy.//Bombo Jez Lapizar
