BAGUIO CITY – Nangrugin a maipatungpal ti odd-even number coding scheme kadagiti parapubliko a transportasion nga addaan iti ruta iti siudad ti Baguio ken iti La Trinidad, Benguet.
Kasaruno daytoy ti panangaprubar ti technical working group ti City Engineering’s Office iti kiddaw dagiti transport group ken drivers a pannakaipatungpal ti nasao nga iskima tapno manayunan ti jeep nga agbiahe iti nasao a ruta.
Immuna a nagsurat ti maysa nga asosasyon dagiti jeep sadiay La Trinidad, Benguet para iti kiddawda a maipatungpal ti odd-even scheme tapnu manayuonan dagiti jeep nga agbiahe iti inaldaw ken maakomodarda dagiti pasahero nga agturong sadiay La Trinidad nangruna iti rush hour.
Sigun kenni Engr. Juanario Burillo, mangidadaulo iti transportation and traffic management division ti CEO, awan ti parikot iti kiddaw dagitoy ngem nasken a maimanihar nga usto dagiti lugan nga aguray ti pasaheroda partikular iti sink hole area sadiay Magsaysay wenno iti sigud a terminal ti Philippine Rabbit tapnu maliklikan ti nailet unay a gunay ti trapiko.
Kagiddan iti daytoy, impanamnama ni Miguel Lumaang, presidente ti Federation of Jeepneys Association of La Trinidad Trunkline iti panagtungpalda iti kiddaw ti CEO.
Inlawlawagna a walo a units laeng ti umun-uneg iti iti sink hole area sadiay Magsaysay kabayatan ti holy hour ken maiwanwanawan ti yunit a maakomodar tunggal met iti rush hour.
Inlawlawagna a dumanon iti 837 a yunit ti agbibiahe iti ruta ti La trinidad-baguio ngem gapu iti pandemya ket naksayan dagitoy.
Innayonna a nagudwa iti tallo ti agbiyahe isu’t gapuna a 279 nga unit ti agbibiahe iti agdama.
Kinunana pay a sag-dua laeng a daras iti makalawas ti panagbiahe ti tunggal unit ngem kalpasan a naaprubaran ti kiddaw ket manamnama nga agalinen a tallo a daras ti panagbiahe dagiti parapubliko a transportasion.
