BAGUIO CITY – Agarup innem a pulo ket pito nga insidente ti panagreggaay ti daga ti nairekord ti Local Disaster Risk Reduction & Management Office iti Baguio City.
Bayat nga agarup tallo pulo ket pito ti nalayos a lugar ken nailukat ti dua nga evacuation center a masarakan idiay Barangay San Luis ken Lucnab.
Iti interview ti Bombo Radyo kenni Engineer Charles Carame, Local Disaster Risk Reduction & Management Officer, partially-damaged dagiti babbalay a naapektran ti bagyo a Carina ken Habagat ngem dagus a nagibakwit dagiti naapektaran a residente.
Pakabuklan a lima a pamilya ti naapektaran ken agtaltalinaedda pay kadagiti evacuation centers bayat a daduma kadagiti naapektaran a pamilya ket nagturongda kadagiti kaarruba ken kabagyan dagitoy.
Kabayatanna, agarup uppat a pulo ket tallo nga insidente ti panaglayos ti naireport iti nasao nga opisina.
Maysa kadagiti rason ti panakalayos ket ti panakarba ti dagdaga a nangitunda iti panakagabor ti kanal a rason ti panag-overflow ti danum, ken sumagmamano a basura ti naipullat kadagiti sumagmamano a kanal.
Mainaig iti dayta, karaman kadagiti makitkita a rason ti panaglayos ket gapu iti panagbalbaliw ti klima.
Nupay kasta, makidkiddaw ti kooperasyon dagiti constituents ken opisyales nga agsagana iti posible a panagtudtudona inton sumaruno a lawas nangruna ta mabambantayan ti low pressure area (LPA) iti paset ti Mindanao.
