ABRA- Dumanonen iti dua pulo ket maysa nga insidente ti pammaltog ti nairekord idiay Abra manipud Enero ita a tawen agingga iti agdama.
Manipud iti nasao a bilang, maysa laeng nga insidente ti na-validate kas election-related violence wenno adda pakainaiganna iti umadanin nga eleksyon.
Iti interview ti Bombo Radyo, kinuna ni Atty. Julius Torres, Regional Director ti COMELEC-Cordillera, walo pay nga insidente ti pammaltog ti mapapati nga adda pakainaiganna iti eleksyon ngem madama pailaeng ti panangberipikar dagiti otoridad nu konektado daytoy iti eleksyon.
Dinakamat ni Torres a gapu iti nagsasaruno nga insidente ti pammaltog idiay Abra ket naipatungpal ti Cordillera Regional Peace Order Council meeting idi Marso 31 a dinar-ayan dagiti opisyales ti Abra, COMELEC, PNP ken dadduma pay tapno marisut ti nasao a pakaseknan.
Iti nasao a council meeting, nakiddaw ti tulong dagiti kandidato a mangipatungpalda iti natalna a panagkampanya ken saanda a mangipatungpal iti kinaranggas bayat ti campaign period.
Sigun met kenni Torres, nagkari met dagiti kandidato nga agtulnog iti pagalagadan ti Commission on Elections iti panagkampanya dagitoy tapno agbalin a natalna ken nakappia ti eleksyon, saan laeng nga idiay Abra nu di ket iti entero a rehiyon Cordillera.//Cara
