BAGUIO CITY – Agtultuloy ti inspeksion nga ipatpatungpal dagiti opisyales ti Kabayanihan Barangay kadagiti naiparikep nga establishimiento iti masakupanda, partikular iti Mabini Street ditoy siudad ti Baguio.
Sigun kenni Punong Barangay Susan Gundran, uppat manipud iti 10 nga establishiemento a naiserbian ti notice of violation manipud iti City Buildings and Architecture (CBAO) ti nagsublin iti operasionda.
Maipalagip a naiserbi kadagiti establishimiento ti notice of violation idi Biyernes gapu iti saanda a panangsurot kadagiti paglintegan ti salun-at kas iti narugit a comfort rooms, nalipit a hallway ken ti saan a panakasurot ti physical distancing.
Inlawlawag ni Kapitan Gundran a naipaayan iti 15 nga aldaw a pawayway dagiti nasao nga establishiemento tapno urnusenda ti panaglinis iti aglawlaw dagitoy.
Karaman kadagiti naiparekep nga establishiemento dagiti pagtagilakuan iti cellphones, panganan ken dadduma pay.
