Sinuspendir ti Office of the Ombudsman ti kabarbaro nga Officer in Charge ti National Food Authority (NFA) a ni Piolito Santos ken ti Department Manager for Operation and Coordination Jonathan Yazon.
Maipalagip nga immunan a nasuspendir dagiti 139 nga empleyado ken opisyales ti NFA pakairamanan da NFA administrator Roderico Bioco, assistant administrator for operations John Robert Hermano, 13 regional managers, 26 branch managers, ken 99 warehouse supervisors.
Daytoy ket kalpasan ti maatap a pangilako dagitoy kadagiti NFA buffer stock rice iti nababa a presyo kadagiti napili a traders a saan a dimmalan iti bidding process.
Gapu iti daytoy, idauloan manen Department of Agriculture Secretary Francisco Laurel Jr. ti National Food Authority (NFA) kalpasan a nasuspendir da Santos ken Yazon.
Sakbay a dinutukan ni Agriculture Secretary Laurel ni Santos kas baro nga Offier in Charge ti NFA idi Marso 6, nagserbi pay daytoy kas Assistant Administrator for Finance and Administration.
Iti baet ti pannakasuspendir dagiti sumagmamano nga empleyado ken opisyales, impanamnama ni Agriculture Secretary Laurel a saan a maapektaran ti operasyon ti NFA.
Kagiddan iti daytoy, ginuyugoyna dagiti nabatbati nga empleyado nga agtultuloy nga aramidenda ti obligasyon ken trabaho dagitoy.
