BAGUIO CITY – Makidkiddaw ti tallo a bulan a panakailaylayon ti consolidation nga immunan nga inwaragawag ti Land Transportation Franchising and Regulatory Board (LTFRB) nga agleppas iti ngudo ti agdama a bulan.
Iti panakiuman ti Bombo Radyo kenni Wilson Bumay-et, Jeepney Federation President ti Baguio-Benguet, pabor daytoy iti consolidation extension tapno makahabol pay dagiti daduma a jeepney drivers ken operators, kasta met tapno makaakar pay dagiti addaan panggep nga umakar iti korporasyon wenno kooperatiba.
Sigun kenni Bumay-et, addaan dagitoyen ti nabukel a kooperatiba ngem agtaltalinaed nga ipatpatungpalda ti boundary system gapu ta awan pay ti nagaplikar a driver.
Agparparang a maysa kadagiti rason iti saan a panagaplikar dagiti drivers ti basbassit a pamastrekan a mapataudda apaman a maibilang dagitoy kas empleyado nga agpasada iti las-od ti walo nga oras tunggal aldaw nu idilig iti agdama a sistema ti panagpasada dagitoy.
Malaksid iti dayta, dinakamat ni Bumay-et a maysa kadagiti pakaseknan dagitoy ti baro a yunit nga imanmandato ti gobyerno a gatangen gapu ta naobserbarda a saan a de-kalidad daytoy iti baet ti nangina a presyona.
Gapu iti dayta, impetteng ti nasao nga opisyal a rumbeng a matalantan nga umuna ti maipanggep kadagiti baro a yunit sakbay ti full implementation iti Public Utility Vehicle (PUV) Modernization program.
Kabayatanna, pinasingkedan ni Bumay-et ti posibilidad a panagtignay dagitoy apaman a mangrugi nga agtiliw dagiti otoridad kadagiti jeep a saan pay a nakapagpaconsolidate agingga inton April 30.//Bombo Rob Dominguez
