BAGUIO CITY – Puntirya ti maysa nga Igorota muaythai artist a magun-od ti kaunaan a balitok a medalyana iti Southeast Asian Games (SEA) Games iti panakaipasungalngalna iti umasidegen a biennial regional multi-sport event a maangay ditoy Pilipinas inton November 30 agingga December 11.
Kas miembro ti muaythai national team, agbalin a panakabagi ti Pilipinas ni Islay Erika Bomogao iti 45kgs female division ti muaythai a maysa kadagiti tampok a combative sports iti 2019 SEA Games.
Naamuan a dumanonen iti dua a bulan nga adda ni Bomogao ken ti grupona iti ruar ti pagilian tapnu agsanay para iti 2019 SEA Games.
Imbingayna a tallo a tawen a rinambakanna ti panagkasangayna nga adayo iti pamilya ken pagtaenganda gaputa kasapulan a tungpalenna dagiti mandatona kas maysa nga atleta.
Idi laeng napalabas a lawas ket rinambakan ni Bomogao ti maika-19 a panagkasangayna ken nagbalin a tarigagay daytoy ti panangabak ti bunggoy ti Team Pinas iti umadani a labanda iti 2019 SEA Games.
Ni Islay ket gold medalist iti 2018 International Federation of Muaythai Associations World Youth Muaythai Championship a naangay sadiay Thailand ken gold medalist metlaeng iti 2017 1st World Martial Arts Masterships a naangay sadiay Jincheon, South Korea.
Agsansanay ti nasao nga student athlete iti nalatak a Team Lakay ken ad-adda pay a mapappapintas ti martial arts skills-na iti sidong ni 2001 SEA Games wushu gold medalist ken Team Lakay head coach ken founder, Coach Mark Sangiao.
Malaksid iti muaythai, nagbalin a panakabagi ti pagadalanna ni Bomogao iti nagduduma a martial arts kas iti wushu ken pencak silat iti uneg ken ruar ti pagilian.
Kabayatanna, iti mix martial arts, iggem ita ni Bomogao ti professional MMA record a 2 wins ken 0 loss ken ranked no. 20 iti Asia Southeast Women’s Pound for Pound ti MMA website a Tapology.
